والله ياجماعة انا امبارح بالليل ومتاخر اضطرتني الهواجس المقلقة الي مشاهدة التلفزيون وفجاءة لقيت الجنرال عامل مؤتمر صحفي وممكن تقول حصة درس خصوصي للصحفيين وعلي مايبدو انه غاوي شرح وكان نفسه يطلع مدرس ولقيته بيقول كلام جامد فوقني اوي وطير النوم من عيني ، اصل انا كنت فاكر الصور اللي بتترأي في دماغي دي حقيقة ، المهم اكيد تهتوا وتوهتكم معايا ، نقول من الأول ، انا شوفت خير اللهم اجعله خير انه يوم 25 يناير من عام 2011 قامت ثورة عظيمة وشارك فيها كل طوائف المجتمع المصري ، اه والله كلهم الصغير والكبير والبنت والولد والمسلم والقبطي وكلهم كانوا علي مستوي المسؤلية وكانت ثورة نظيفة اوي وصحيح الحزب الوطني والنظام عاند شوية ، بصراحة مش شوية هما 18 يوم كاملين ومات اكتر من 400 شهيد والف وخمسمائة جريح ومصاب وكتير منهم اصابتهم بالغة والمهم بالنهاية نجحت الثورة والحزب اللي اسمه وطني أتحرق وانتهي والرئيس تنحي عن الحكم والجيش الله يستره ساند الشعب بثورته وكان حامي للشعب ،، لاتنسي كل ده كان حلم لأنني فوقت أمبارح علي كلام الجنرال لقيته بيقول كلام كتير وماجبش سيرة ثورة ولم يذكر هذه الكلمة مطلقا مع أنني شوفت في الحلم الجيش بيدي تحية الشهداء ، المهم لقيت الجنرال بيقول انه الشباب عاوزني أغير الحكومة ونشكل حكومة ائتلافية وبيسئل ازاي اذا كان مافي حزب معارض قادر انه يعطيه اتنين مرشحين للوزارة وده كلام حلو وصحصح بقه معني كلامه انه الحزب اللي اسمه وطني لسه بيحكم وان الباقي لسه اسمهم احزاب معارضة وكمان ضعيفة ومش تقدر انه ترشح وزير او تانين مش انها ترشح وزارة ياجماعة اصحوا بقه وفوقوا الجنرال بيقول مافي احزاب غير الوطني اللي يقدر يشكل فبلاش استهبال بقه وكمان حلف بالله اكتر من خمس مرات انه عارف بيعمل ايه وانتم ياشعب مش فاهمين ومستعجلين وبس وبتقول كلام مش ممكن يتحقق ، عارفين ليه لانكم مش حزب وطني ومش بتفكروا بالعقل والحكمة اللي ربنا وهبها للحزب الوطني ، طيب نعدي دي ،، اكيد حضرتك مش مصدقني انني كنت باحلم تعالي اسمع معايا كلام الرجل وحالف بخمس ايمانات مغلظة انه صادق وبيفهم وعارف هو بيعمل ايه تعالي معايا وشوف الدليل اننا كنا نايمين وبنحلم الراجل الطيب قال تغير وزارة ايه واعتراض ايه ياجماعة وقال الوزارة دي متقسمة لمجموعات ، المجموعة الاولي فرضت عليه وغصب عنه ولازم يفضلوا بالحكومة ، بلاش تفتح عيونك وتغمض وفوق وقولي انت ياللي بتجادل وتتفلسف مين اللي فرض علي الجنرال ومين اللي قال للراجل لازم يفضلوا في مكانهم ،، صح كلامك هو.... طيب بتقول انه تخلي ليه بقه وبتجادل وتتفلسف ، وفي مجموعة تانية لازم تفضل علشان البلد ماتقع ونلاقي رغيف عيش وانبوبة بوتجاز ، ياخرابي هي البلد ماوقعتش لسه وبعدين في مثل بيقول المبلول مش بيخاف من المطر واحنا مبلوليين اوي وواقعين اوي ولسه بتقول لازم نخليهم ،، طيب هاصدق اللي يقول ثورة ازاي وتغيير ، وعندي سؤال ولامؤاخذة من غير زعل مين اللي لو خرج البلد هاتقع الوزيرة اللي بتبوس ايد سوزان ؟ ام اللي باع الغاز ؟ ام اللي ضيع هيبة البد بالخارج ؟ ام اللي زور ثلاث انتخابات برلمانية ام .... ياجماعة الجنرال واللي معاه لسه فاكر ان الشعب جاهل ومش بيفهم وبدليل هذا الكلام والشرح اللي بيشرحه للصحفيين ولينا وانا هارد علي الجنرال بقصة قصيرة اوي - حدوتة قبل النوم - علشان ينام ونرتاح شوية -،، كان ياماكان في سالف العصر والأوان كان هناك رجل ثري جدا ومالوش بالدنيا غير اطفاله وليه قريب شرير -اه حزب وطني - مثلا يعني - لا ماليش علاقة ومش اعرف ابن عز ولا ابن وز - المهم الرجل مات وترك اطفاله وثروة كبيرة عبارة عن ابل وأغنام وخيل ولم يجد الناس لهم قريبا الا ذلك الرجل الشرير – المهم جابوا الرجل وقالوا له هاتمسك فلوس الايتام وترعاها وتحافظ عليها و حلف بالله امام الناس انه يرعي شؤون الايتام ويحافظ ليهم علي حلالهم - واستلم المهمة وتربح من ورائهم وسرق اموالهم وكله مكتوب بالكراسة - علي فكرة الكراسة مش مقصود بيها كلام الجنرال أمس لما قال عن اختيار الوراء انه صحيح ومكتوب عنده بالورقة وعنده رد لأي بجح يحاول يسأل ليه الوزيرة دي موجودة او الوزير ده موجودة وخلاص الرجل اقسم باليمين وحلف وقال كله مكتوب وعنده الرد ،، المهم نرجع للحدوتة الشرير كان يسجل كل شئ ويأتي بأخر العام ويقدم ميزانية محترمة ويقول للأطفال أنكم ربحتم كأم مليون السنة دي ويسألوه فين الفلوس ويرد ويقول اشترينا أحذية للجمال والبغال والحمير والأطفال تصدق ومش شايفين أي عائد ولما كبر الأطفال وأدركوا وفهموا كل شئ وجاء الشرير في اخر العام وقال جبنا أحذية للجمال ردوا وقالوا ياعموا ... هي الجمال بتلبس أحذية ؟ هنا أدرك الشرير أن الأطفال كبروا وعندهم وعي كافي وترك لهم الحلال وقال ليهم الآن مش ينفع اشتغل معاكم وخذوا حلالكم وأديروه بمعرفتكم ،، وطبعا مش الجمال والبغال والحمير دول بتوع معركة البغال الشهيرة يوم 28 يناير 2011 ولكن الله اعلم ربما تكون هي ومش المقصود بيها رمز الحزب إياه ،، المهم متي يدرك الجنرال إننا كبرنا وفهمنا ومتي نقول للجنرال هي الجمال بتلبس أحذية ياعمو شفيق ؟
ويا تري هانشوف اليوم أم هانحلم أيضا ؟؟
